Бишкектеги жаңы конушта балдарды туура тарбиялоого чакырган иш-чарада ата-энелер жана балдар үчүн түрдүү оюндар уюштурулду

Калыс-Ордо конушунда 5-апрелде "Апам, атам жана мен" деген аталыштагы эстафета орун алды. Балдарды коргоо борборунан кабарлашкандай, эстафета тургундарга кубаныч тартуулоо, үй-бүлөдө балдар менен ата-энелердин ортосундагы мамилени чыңдоо, балдарга зордук-зомбулуксуз тарбия берүүгө чакыруу максатында уюштурулду.

"2014-жылы 8 жаңы конуштан ата-энелер келип, "Балдарга кордук көрсөтүүнү токтот" деген долбоор алкагында тренингден өтүшкөн. Өз тажрыйбамдан улам бала тарбиялоодо кандай катачылыктар болорун билем. Учурда өз билгендерибизди жаш ата-энелер менен бөлүшүп жатабыз",- дейт уюштуруучу топтун башчысы Керез Абдырасулова.

Эстафетага Калыс-Ордо, Келечек, Эне-Сай, Ак-Жар конуштарынан 10 үй-бүлө жана №57-мектептин окуучуларынын ата-энелери келип катышты. Алар өз ара аркан тартыш, алкак менен ойноо (обруч), чуркоо, кап кийип жарышуу боюнча жеңүүчүлөрдү аныкташты. Катышуучуларды тургундар, аксакалдар колдоп турушту.

Автор: Максат Кудайбердиев
Фото: Уюштуруучулардыкы