Шашылыш билдирүү! Өлкөнүн тоолуу райондорунда кар көчкү түшүү коркунучу бар

Бүгүн, 11-апрелде күтүлүп жаткан жаан-чачындарга байланыштуу өлкө аймагындагы тоолуу аймактарда, Бишкек-Ош унаа жолунун 121-137 жана 198-265-чакырымдарында, Ысык-Көл облусундагы Каракол-Эңилчек унаа жолунун 45-90-чакырымдарында жана Жалал-Абад облусундагы Ала-Бука - Каныш-Кыя унаа жолунун 70-90-чакырымдарында кар көчкү түшүүсү жана кар күрткүсү күтүлөт. Жолдор тайгак болуп, муз тоңот. Унаалардын ортосунда 500 метр аралык кыймыл чектелиши зарыл.

Шашылыш билдирүүнүн негизинде адамдардын өлүмүнө жеткирбөө жана материалдык чыгымдарды азайтуу максатында 2016-жылдын 9-апрелинде ӨКМ тарабынан телефонограмма чыгарылып, тийиштүү Жарандык коргонуу кызматтарына, КР Өкмөтүнүн облустардагы ыйгарым укуктуу өкүлдөрүнө, Бишкек жана Ош шаарларынын мэрлерине жеткирилди жана уюлдук операторлор аркылуу элге СМС билдирүүлөр жөнөтүлдү. Бул тууралуу Өзгөчө кырдаалдар министрлигинен билдирди.

Автор: Мальвина Уметбекова