Ыктыярдуу патенти жок туруп ташып келе жаткан товарларынын баасын төмөн көрсөткөн айдоочулар кармалышты

Салык кызматы айдоочулардын жүк ташуу кызматына патенти жок туруп ЕАЭБге мүчө өлкөлөргө товарларды ташып кирип жатканын ачыкка чыгарды. Салык кызматы бир жума аралыгында кыргыз-казак чек ара тилкесиндеги "Чоң-Капка" өткөрүү жайында атайын рейд жүргүзгөн.

Аталган мекеменин маалымат кызматынан билдиришкендей, айрым айдоочулар толтурулган талонго товардын азайтылган наркын көрсөтүшкөн. Тактап айтканда, алынып келинген 1 килограмм ундун баасы талондо болгону 3,5 сомду түзгөн. Ал эми 1 килограмм ундун базар баасы Кыргыз Республикасында орточо эсеп менен 20-25 сомду түзөт.

Ал эми дагы бир ыктыярдуу патенти жок айдоочу талонго жүктүн наркын 10 миң сом деп көрсөтүп алган. Товардын баасын өз наркынан он эсеге төмөн көрсөткөн айдоочу 2 миң литр күн карама майын ташып келген. Ошондой эле “Ак-Жол” көзөмөл-өткөрмө пунктунан да ушул сыяктуу фактылар аныкталган.

Автор: Акназар Сулайманкулов