Жалал-Абадда учурда 121 согуш ардагери бар (фото)

Жалал-Абад шаарында 9-майда Жеңиштин 71 жылдыгы белгиленди. Бул тууралуу бүгүн SUPER.KG порталына Кыргыз Республикасынын Жалал-Абад облусундагы ыйгарым укуктуу өкүлүнүн басма сөз кызматы билдирди.

"Согуш талаасына Жалал-Абад облусу боюнча 30 миң жоокер аттанып, анын ичинен 18 миңден ашуун жоокер өз элине кайтпай калган. Учурда облус боюнча 121 согуштун ардагери жана 142 ооруктун катышуучусу калды. Ошондой эле согуштан өмүрлүк жолдоштору кайтпай калган 368 эне бар. Убагында келечек урпактардын эртеңи үчүн кан кечип салгылашкан аталарыбызга таазим кылып, сый көрсөтүп жатабыз. Бул күнү облусубуздун бардык район-шаарларында салтанаттуу иш-чара өткөрүлдү", - деп билдирди басма сөз кызматы.

Жалал-Абад шаарында өткөн салтанатта өкмөттүн Жалал-Абад облусундагы ыйгарым укуктуу өкүлү Жумагүл Эгембердиева согуш ардагерлерин, ооруктун катышуучуларын жана шаар тургундарын Улуу Жеңиш майрамы менен куттуктап, Өчпөс отко гүлчамбар койду.

Автор: Акназар Сулайманкулов
Фото: Басма сөз кызматы