Бишкек милициясы көчөгө орнотулган пианинодон шектенип, алып кетти

Бишкекте шаардыктарга белек катары көчөгө орнотулган пианинону милиция алып кетти. Маалыматка таянсак, шектүү буюм тууралуу милицияга бүгүн эртең менен маалымат түшүп, аймак курчоого алынган. Аны сапёрлор текшерүүгө алышкан. Пианинону "Ата Мекен" партиясынын жаштар канаты өткөн аптада орноткону белгилүү болду.

"Пианинону жума күнү кечкисин Киев-Абдрахманов көчөлөрүнүн кесилишине койгонбуз. "Бишкек почтамттын" күзөтчүлөрү менен макулдашканбыз. Алар "бул жерди сутка бою кайтарбайбыз, бирок көз салып турабыз" дешкен. Азыр милиция "Бишкек почтамттын" күзөтчүлөрү билген эмес деп жаткан окшойт. Бул бишкектиктерге белек болчу. Келип ойноп көргөндөр болуптур", - дешти партиянын өкүлдөрү.

Пианино учурда Свердлов райондук ички иштер башкармалыгында.

Автор: Автандил Добулбеков