“Түндүк электр” ишканасы инвестициялардын эсебинен Чүй жана Талас облустарына 20 миң “акылдуу” эсептегич орнотот

КРдагы электр энергия менен жабдуунун ишенимдүүлүгүн жогорулатуу жана эсеп берүүнү жакшыртуу боюнча инвестициялык долбоордун чегинде “Түндүк электр” ишканасы электр энергия керектөөчүлөрүнө 20 миң “акылдуу” эсептегич орнотот. Бул тууралуу аталган ишканадан билдиришти.

"Акылдуу" эсептегичтерден Чүй облусуна 18 миң бирдик, Талас облусуна 2 миң бирдик орнотулат.

Бул эсептегичтер биринчи катарда энергияны көп колдонгон ири керектөөчүлөргө орнотулат, иштердин башталышы 2016-жылдын III кварталына пландалууда. Бул максатка каралган инвестициянын болжолдуу суммасы 1 миллион 900 миң АКШ доллардан ашуун каражатты түзөт. Жабдууларды тендер жеңүүчүсү "Hexing Electrical Co. Ltd" кытай заводу жеткирип келет.

"Эске салсак, инвестиция эсебинен алынган 20 миң эсептегичтен сырткары “Түндүк электр” ишканасы Чүй жана Талас облустарына өз эсебинен 34 425 бирдик эсептегичтерин орнотот. Жалпысынан керектөөчүлөргө 2016-жылы 54 425 электр энергияны эсептөөчү “акылдуу” жабдуу орнотулат", - деп айтылат маалыматта.

Автор: Максат Кудайбердиев
Фото: Интернеттен алынды