Быйыл өлкөдө балдарды сатуу боюнча 6 кылмыш иши козголгон

1-Июнь - Балдарды коргоо күнүнө карата "Балдарды сатуу - коомчулуктун көйгөйү" аталышында Жогорку Кеңештин депутаттары, өкмөттүк эмес уюмдар, тийиштүү мамлекеттик кызматкерлер жана ИИМдин кызматкерлери катышкан тегерек стол өттү. Бул тууралуу бүгүн, 31-майда Кыргыз Республикасынын Ички иштер министрлигинин басма сөз кызматынан билдиришти.

Иш-чаранын жүрүшүндө балдардын укуктары бузулуп, сатылып жатканына жалпы коомчулук каршы туруп күрөшүү зарыл экендиги айтылды.

"2014-жылы өлкөдө балдарды сатуу боюнча 10 кылмыш иши козголсо, 2015-жылы 4 ай аралыгында 18 факт катталган. Ал эми 2016-жылдын алгачкы айларынан ушул күнгө чейин 6 кылмыш иши козголгон", - деп билдирди ИИМдин Кылмыш иликтөө башкы башкармалыгынын башчысы Саламат Адылов.

Тегерек столдо адамдарды сатууга каршы чараларды көрүү үчүн атайын башкармалык түзүлгөнү да маалым болду.

Автор: Акназар Сулайманкулов
Фото: Интернеттен алынды