Ала-Бука районундагы Нурмолдо атындагы музейге каражат бөлүнгөн, бирок оңдоп-түзөө иштери баштала элек

Ала-Бука районундагы Нурмолдо атындагы музейди оңдоп-түзөө иштерине каражат бөлүнгөн, бирок оңдоп-түзөө иштери баштала элек. Бул тууралуу бүгүн, 22-июнда SUPER.KG порталына музейдин кызматкери Малюда Сагынбаева билдирди.

"Райондун борборундагы Нурмолдо атындагы музейге 2016-жылдын башында бюджеттик кароодо Ала-Бука айыл аймагы жылдын 2-кварталына каражат бөлүп берген. Бирок музейди оңдоп-түзөө иштери азыркы күнгө чейин башталбай, кечигип жатат", - деп билдирди Сагынбаева.

Ал эми музейдин жетекчиси Алибек Адылбековго байланышканыбызда ал: "Ушул жума ичинде баштайбыз. Учурда тендер жарыялаганбыз. Бул боюнча көйгөй жок. Каражат өз убагында бөлүндү", - деп билдирди.

Белгилей кетсек, бүгүнкү күндө музейди оңдоп-түзөө иштери баштала элек. Буга чейин музейдин жетекчиси Алибек Адылбеков оңдоп-түзөө иштери үчүн каражат бөлүнгөнү тууралуу 13-майда SUPER.KG порталына маалымат берген.

Автор: Акназар Сулайманкулов
Фото: Акназар Сулайманкулов