Өзгөн районунун Дөң-Булак айыл аймагында 55 миллион сомго бааланган мектептин курулушу башталды (фото)

Өзгөн районунун Дөң-Булак айыл аймагында 55 миллион сомго бааланган мектептин курулушу башталды. Бул тууралуу бүгүн, 28-июнда SUPER.KG'ге Бакмал орто мектебинин директору Нуржан Калбердиева билдирди.

55 миллион сомго бааланып курулуп жаткан бул мектеп 275 орунга ылайыкташып, эки кабаттуу болуп салынмакчы.

"2015-жылы ноябрь айында жер титирөөдөн Бакмал мектебинин дубалдарынан жарака кетип, мектеп жабылган болчу. Буга чейин эле чатырынан тамчы тамып, ыңгайсыздык жаратып келген. Анткени мектеп 1956-жылы курулуп, эскилиги жетип калган эле. Билим берүүгө мүмкүн болбой калганда мектепти таштап чыгып кеттик, бирок окуунун жүрүшү үзгүлтүккө учураган жок", - деп билдирди Калбердиева.

Курулуш иштерин сентябрь айына бүтүрүү мерчемделүүдө.

Автор: Акназар Сулайманкулов
Фото: Нуржан Калбердиева