Кыргыз улуттук университетинин окутуучуларынын кайрылуусу боюнча комиссия түзүлдү

Жусуп Баласагын атындагы Кыргыз улуттук университетинин кызматкерлеринен келип түшкөн кайрылууларда көрсөтүлгөн фактыларды жана Ж.Баласагын атындагы КУУнун билим берүү жаатындагы ченемдик-укуктук актыларынын талаптарынын аткарылышын текшерүү максатында Кыргыз Республикасынын Билим берүү жана илим министрлиги тарабынан комиссия түзүлгөн. Бул тууралуу аталган министрликтин басма сөз кызматы кабарлады.

"Аталган комиссия 2016-жылдын 1-июлунан 7-июлуна чейин кайрылуулардагы көтөрүлгөн маселелер боюнча текшерүү жүргүзүп, 8-июлда Билим берүү жана илим министрлигине корутундусу тапшырылат. Текшерүүнүн жыйынтыгы боюнча тиешелүү чаралар көрүлөт", - деп билдиришти министрликтен.

Эскерте кетсек, кечээ, 30-июнда Жусуп Баласагын атындагы Кыргыз улуттук университетинин мугалимдери ректораттын адилетсиз кадрдык саясатына нааразы болуп митингге чыгышкан.

Автор: Үмүт Абдраимова
Фото: Окурмандыкы