Социалдык тармактарда өлкөбүздүн президенти Кыргыз жергесине келген конокторду "Ала-Арча" резиденциясына алып барган сайын бир эле кийим менен барарын жазып, талкууга алышууда. Мындай талкуу буга чейин да болуп келген. Мурдагыларында көпчүлүк терс оюн айтышса, бул ирет президентти мактагандар көп.
Дүйнө жүзүндө ийгиликтерди багынткан кээ бир инсандар бир эле үлгүдөгү кийим кийишет. Алардын катарына "Facebook" социалдык тармагынын негиздөөчүсү Марк Цукерберг, "Apple" компаниясынын негиздөөчүсү Стив Жобс, АКШнын президенти Барак Обама, окумуштуу Альберт Эйнштейн, "Chanel" фирмасынын креативдүү директору Карл Лагерфельд, "Интерстеллар" тасмасынын режиссёру Кристофер Нолан кирет.
Марк Цукербергдин кийими жадатма болушу мүмкүн, бирок анын айтымында, бир эле футболканы кийүү жумуштагы башка маанилүүрөөк иштерге көңүл бурууга жардам берет.
"Чынында, мен күндө ойгонуп, миллиарддан ашуун адам үчүн кызмат кылганыма бактылуумун. Кийим тууралуу каяктагы болбогон ойлорду ойлонуп, өз ишимди мыкты аткарбай жаткандай сезем. Мен жашоомду керексиз нерселерден тазалагым келгендиктен, коомчулукка кызмат кылуудан башка иштер тууралуу чечимдерди аз кабыл алууга аракеттенем", - деп айткан Цукерберг 2014-жылы.
Ал көптөгөн майда көйгөйлөргө күчүн кетиргиси келбейт. Анын гардеробу боз футболкалар менен көк жынсы шымдарга толгон. Күндө эртең менен эмнени эмне менен айкалыштырып, кайсы кийимди кийишти ойлонбой кийип кете берет.
Мындай адамдар күнүмдүк маселелерге караганда убакытын жумушка бөлүүнү туура көрүшөт.
Стив Жобс ар дайым кара водолазка, көк жынсы жана "New Balance" кроссовкаларын кийген. Ал бир гана өзү эмес, кызматкерлерин да бул трендге көндүрүүгө аракеттенген. Жобс компаниянын кызматкерлери үчүн атайын форма киргизүүнү каалаган, бирок алар каршы болуп коюшкан. Анын өзүнө бул идея жаккандыктан 100дөй даана даярдатып алган.
АКШнын президенти Барак Обама дагы же көк, же боз костюм кийип жүрөт. Цукербергдей эле олуттуу маселелерге күчүн сактап коёт.
"Мен эмне жеп, эмне кийип жүргөнүм тууралуу ойлонгум келбейт. Менин көңүлүм андан да маанилүүрөөк башка нерселерге бурулушу зарыл", - деген Обама.
Бул анча деле таң каларлык эмес. Көптөгөн саясатчылар негизинен көк же кара костюм кийишет.
Көптөгөн адамдар Альберт Эйнштейнди да бир эле фасондогу кийимди кийген деп айтып келишет. Бирок анын биографиясын изилдеген окумуштуулар бул сөздөрдү жалган дешет.
"Chanel" фирмасынын креативдүү директору Карл Лагерфельд өзүнүн "униформасын" тандап алган. "Униформасы" пиджак, шым, жилет, төйнөгүчү бар галстук жана 1970-жылдардагы шиш тумшуктуу ботинкадан турат. Кээ бир аксессуарлар 10 жылда бир кошулганы менен, "униформасынын" негизги базасы алмашкан эмес. "Chanel'дин" директору болуу үчүн сөзсүз түрдө мода артынан түшүүнүн кажети жок.
Ошондой эле күндө жаңы кийим тандоону энергияны себепсиз жоготуу деп эсептегендердин арасында "Интерстеллар" тасмасынын режиссёру бар. Ал каралжын пиджактын астынан жакасы сүрүлгөн көк көйнөк, астына жукарып калган кара шым, бутуна бышык ботинка кийип алат.
Бул тизмеге кандайдыр бир деңгээлде өлкөбүздүн башчысы Алмазбек Атамбаевди да киргизсе болчудай. Себеби бул маалыматтын башында жазылган.
Алмазбек Атамбаев Түркмөнстандын президенти Гурбангулы Бердымухамедов менен 2015-жылдын 5-августунда "Ала-Арча" резиденциясында.
Орусиянын премьери Дмитрий Медведев менен ушу жылдын 7-июнундагы жолугушуусу.
Кечээ, 14-июлда президент Ала-Арчага Германиянын канцлери Ангела Меркелди өзүнүн үй-бүлөсү менен алып барды.
Мода индустриясынын өнүгүүсү менен биргеликте 10дой гана негизги кийим бар капсулдук гардеробдор популярдуу болуп бара жатат. Ага көбүнчө бай жана ийгиликтүү адамдар кайрылышат. Анткени андай гардероб менен чечимди аз чыгарууга, убакытты жана каражатты үнөмдөөгө мүмкүн.
