ЖЫЛНААМА, 22-ИЮЛЬ: Америкалык актриса жана ырчы Селена Гомес 24 жашка толду

Америкалык актриса жана ырчы Селена Гомес бүгүн, 22-июлда 24 жашка толду. Ал 1992-жылы АКШнын Техас штатындагы Гранд-Прейри шаарында туулган.

Селена Гомес италиялык Мэнди Корнетт менен мексикалык Рикардо Гоместин кызы. Мэнди менен Рикардо кызы 5 жашка чыкканда ажырашып кетишкен. Театрда актриса болуп эмгектенген апасы кызын жалгыз тарбиялаган. Селена 9 жашында кастингден өтүп, “Барни жана анын достору” мультсериалына тартылып калган. Мындан кийин дагы “Күлчү кыз тууралуу дагы бир окуя”, “Ханбийкелерди коргоо программасы”, “Ханна Монтана”, “Тыңчылардын балдары 3: оюн бүттү” жана башка тасмаларда роль жаратып, көптөгөн сыйлыктардын ээси болгон.

Бара-бара ырчылыкка да аралаша баштап, 2009-жылдан тартып “Селена Гомес жана сахна” (“Selena Gomez & the scene”) аттуу поп-рок тобун түзүп, өзү анын вокалчысы болуп калат. Алардын дебюттук альбому “Өп жана айтып бер” (“Kiss & tell”) деген аталышта ушул эле жылы чыккан. Селена Гоместин ырлары поп-рок, дэнс-поп, синти-поп стилинде.

Ырчы жаш болгону менен, кайрымдуулук жаатында да таанымал болуп, 2009-жылы 16 жашында ЮНИСЕФтин тарыхында эң жаш ыктыярдуу элчи болгон.

22-июлдун жылнаамасы.

Автор: Максат Кудайбердиев