ЖЫЛНААМА, 25-ИЮЛЬ: Ырчы, актриса Асема туулган күнүндө баласынын тоюна даярданууда

Мындан 30 жыл мурун, 1986-жылы 25-июлда актриса, ырчы Асема Токтобекова төрөлгөн. Учурда Асема өзүнүн туулган күнүнө эмес, баласынын сүннөт тоюна даярданып жатканын билдирди.

"Балам экөөбүздүн майрамыбыз удаа келип калгандыктан, мен үчүн баламдыкы маанилүүрөөк, андыктан анын майрамына көбүрөөк көңүл бурам. Өзүмдүкүн үйдө эле курбуларымдын курчоосунда өткөрөм. 30га чыгып жаткандыктан, өткөрбөй койсом болбойт. Буюрса, маараке да өткөрөбүз. Азыр болсо балам Адахандын сүннөт тоюна даярданам. Чоң ата менен чоң апасы да чоң той өткөрүүгө камынып жатышкан учуру", - дейт Асема.

Асема Токтобекова Бишкек шаарында төрөлгөн. 2008-жылы Кыргыз улуттук университетинин эл аралык байланыш факультетин, кийин Б.Бейшеналиева атындагы Кыргыз мамлекеттик искусство институтун аяктаган. 2008-жылы "Боз салкын" тасмасындагы мыкты ролу үчүн Баку шаарында өткөн "Восток-Запад" Эл аралык кинофестивалында "Эң назик образ" ("За самый женственный образ") байгесине ээ болгон.

25-июлдун жылнаамасы.

Автор: Үмүт Абдраимова
Фото: Асема Токтобекова