53 жыл мурун, тактап айтканда, 1963-жылы 9-августта америкалык ырчы, актриса, продюсер, фотомодель Уитни Элизабет Хьюстон жарыкка келген. Ал АКШнын Нью-Жерси штатындагы Ист-Оранж шаарында төрөлүп-өскөн. Ал бала чагынан эле музыка менен чоңойгон. Апасы белгилүү ырчы Эмили Дринкард элге Сисси деген ат менен таанымал. Ал эми атасы Жон Хьюстон апасынын менеджери болгон. Болочок ырчы жаш курагынан эле апасы менен чиркөөдө хордо ырдап, өз талантын эл алдына алып чыга баштаган. 11 жашынан тарта фотомодель катары да иштеп, көптөгөн жарнамалык түрмөктөргө тартылган. Ал кезде болочок дүйнө жылдызы бий жана актёрдук чеберчилик боюнча атайын ийримдерге да барчу. Уитни үй-бүлөдө 4 бир туугандын эң кенжеси болгон.
"Гиннесстин рекорддор китебинде" Уитни Хьюстон эң көп сыйлыктардын ээси болгон артист катары жазылып калды. Анын сыйлык, наамдары жалпы 411ге жеткен. Ал 2 “Эмми”, 6 “Грэмми”, “Billboard” журналынын 30 атайын сыйлыктарынын ээси. Анын альбомдору жалпысынан 170 миллион даана менен сатылып, бул жаатта да эң алдынкылардын катарында. Мындай ийгиликтүү кадам ырчы үчүн 1983-жылы популярдуу "Ариста" компаниясынын президенти Клайв Девис менен болгон келишимге кол коюлган күндөн башталган. Андан бир жыл өтпөй эле өзүнүн ысымынан аталган алгачкы альбомун чыгарып, атын алыска тааныткан. 1987-жылы “Сага болгон сүйүүмдү сакта” аттуу ыры менен “Грэмми” сыйлыгын алгачкы ирет багындырган.
Уитни Хьюстон 2012-жылы 11-февралда Лос-Анжелестин “Беверли Хиллтон” мейманканасында 48 жаш курагында дүйнө салган. Уитнинин жуунуучу бөлмөдө жаткан чала жан денесин анын жан сакчылары көрүп, “Тез жардам” чакырышкан, бирок баары кеч болуп калган.
9-августтун жылнаамасы.