ЖЫЛНААМА, 30-АВГУСТ: Бокс боюнча Дүйнөнүн 7 жолку чемпиону Орзубек Назаров 50 жашка толду

Бүгүн, 30-августта бокс боюнча профессионалдар арасында Дүйнөнүн 7 жолку чемпиону, СССРдин Эмгек сиңирген спорт чебери, КРнын Бокс федерациясынын вице-президенти, 4-чакырылыштагы ЖКнын депутаты Орзубек Назаров 50 жашка толду. Ал 1966-жылы Кант шаарында туулган.

Кыргыз мамлекеттик дене тарбия институтун бүтүргөн. Жаш кезинен бокс дүйнөсүнө аралашып, машыга баштайт. 16 жашында СССРдин Спорт чебери, 18 жашында Эл аралык класстагы спорт чебери даражасына жетишкен. Спорт сүйүүчүлөрүнүн арасында СССРдин жаштар арасындагы мелдешинин 4 жолку жеңүүчүсү, Европанын 2 жолку, СССРдин 3 жолку чемпиону, Дүйнө чемпиондугунун 3 жолку байге ээси болгон. 1987-жылы Европанын эң мыкты мушкери болгон. Профессионалдык рингде Япониянын 5 жолку чемпиону, Азия менен Океаниянын 6 жолку чемпиону, Дүйнөнүн 7 жолку чемпиону болгон. Спорт сүйүүчүлөрүнүн арасында 165 жолу рингге чыгып, 153 ирет жеңишке жетишкен. Профессионалдык рингде 28 беттеш өткөрүп, анын 27син уткан (23 нокаут).

1998-жылы ноябрда Алматы шаарында акырегине ок жеген. Тактап айтканда, ал достору менен аэропортко баратканда аларга 4 ирет ок атылып, мушкердин 2 досу көз жумган. Мушкер акырекке ок жеп, бактыга жараша, аман калган. Кылмыш жасагандар табылбай калган.

Ал өкмөттүк грамоталар, баалуу белектер, Даңк медалы менен сыйланган.

30-августтун жылнаамасы.

Автор: Максат Кудайбердиев