"Бешинчи баласын төрөгөн сиңдим дарыгердин шалаакылыгынан улам каза болду". Бул тууралуу бүгүн, 1-сентябрда SUPER.KG порталына маркум Саадат Мураталиеванын эжеси Жаркын Мураталиева билдирди.
“Сиңдим Саадат 2-август күнү Чүй облустук төрөт үйүндө көз жарды. Ооруканага өзүм таңкы саат 6да алып баргам. Саат 08:00 чамасында кесарево жолу менен көз жарып, уулдуу болгон. Кечки саат 18:00 чамасында туугандар менен барып куттуктап кеткенбиз. Сиңдим жандандыруу бөлүмүндө аны эч ким карабай жатканын айтып, жанында болууну суранган. Бирок жандандыруу бөлүмүнө эч кимди киргизбейт экен да. Эртеси күнү саат 23:00 чамасында дарыгерлер телефон чалып, сиңдим оор абалда экенин жана жатынына кан толуп кеткенин билдиришти. Биз дароо ооруканага бардык, бирок бизди киргизишкен жок. Түнкү саат үчтөр чамасында ага экинчи ирет операция жасалып, дарыгерлер саат төрттө чыгышты. Дарыгерлер ага кан куюп жатышты, бирок жандандыруу бөлүмүнүн дарыгери бизге жолугуп Саадаттын абалы оор экенин маалымдады. 5-август күнү сиңдим Бишкектеги №6-төрөт үйүнө которулуп, ал жакта 11-августка чейин жатты. Сиңдимдин абалы оорлошкондон оорлошуп, аны М.Мамакеев атындагы Улуттук хирургиялык борборуна которушту, бирок андан деле абалы жакшырган жок. 16-август күнү ал ооруканадан каза болуп калды. Эгерде сиңдимди көзөмөлдөгөн дарыгер-гинекологу Фарида Максутова убагында тиешелүү медициналык жардам көрсөтүп, аны эртерээк төрөткөндө ал аман калмак”, - дейт Ж.Мураталиева.
Анын айтымында, төрөттөн кийин абалы оорлошуп кеткен Саадат Мураталиева кош бойлуулуктун 7-айында ооруканага жардам сурап кайрылган. Анда кош бойлуу айымдын буттары шишип, ичи ооруп ооруканага алынып келинген.
"Сиңдим Фарида Максутовада каттоодо болчу. Айт күнү саат 23:00дө Саадаттын кан басымы көтөрүлүп кетип ооруканага барган. Ошол түнү нөөмөттө Максутова өзү болгон. Ал урушумуш болуп, сиңдимди дароо ооруканага жаткырган. Дары жазып берип, бирок эртеси башка дарыгерге тапшырып, эс алганга кетип калган. Кимге тапшырганы азыркыга чейин белгисиз. Үчүнчү күн дегенде оорукананын башчысы сиңдимди "үйүңө барып дарылана бер" деп үйгө чыгарып жиберген", - деп кошумчалады маркумдун эжеси.
Ал эми маркумдун 17 жаштагы Кумар аттуу уулу апасы кичүү инисин көрбөй кеткенин кошумчалап, учурда 1 ай боло элек инисин атасынын эжеси карап жатканын билдирди.
“Апам туулган күнүнө 4 күн жетпей каза болуп калды. 20-августта анын туулган күнүн белгилемек болчубуз, апам 40 жашка толмок... Тилекке каршы, апам жаңы төрөлгөн инимди да көрбөй кетти. Акыркы жолу сүйлөшкөндө “Балам жакшы элеби?” деп бир жолу сураганга жетишти. Көз жарган күндүн эртеси эле абалы начарлап, кайра операция жасалды. Ошондон кийин эсине келген жок, кийин ооруканадан каза болуп калды. Чүй облустук ооруканасынын төрөт бөлүмүнүн дарыгерлери "алып кеткиле, даярдана бергиле" деп айтышкан. Анан апамды шаарга которууга туура келген”, - дейт маркумдун уулу.
Саламаттык сактоо министрлигинин Медициналык жардам көрсөтүү жана дары-дармек саясаты башкармалыгынын башкы адиси Раиса Асылбашева бул окуя тууралуу төмөнкүлөрдү билдирди:
“Учурда бул факт боюнча иликтөө иштери жүрүүдө. Соттук-медициналык экспертиза дайындалган, анын жыйынтыгы ушул айдын соңунда даяр болот. Экспертизанын жыйынтыгы менен көп суроолорго жооп табылып, чекит коюлат деген ойдомун. Маркумдун туугандары дарыгерлердин үстүнөн прокуратурага арыз менен кайрылышкан. Учурда бул иш прокуратуранын көзөмөлүндө, тиешелүү документтердин баары өткөрүлүп берилген. Каза болуп калган эненин өмүрүн сактап калуу максатында аны шаарга которушкан, тилекке каршы, максат ишке ашкан жок”.
