Малайзиянын бийлиги Зика вирусу менен жабыркаган алгачкы учурду жарыялады

Малайзия бийлиги өлкөдө Зика вирусу менен жабыркаган адам катталганын тастыктады. Бул тууралуу чет элдик басылмалар жазып чыгышты.

Маалыматта кабарлангандай, Зика вирусун алып жүрүүчү катары саналган аял жакын арада эле Сингапурда болуп келгендиги белгилүү болду. "Өлкө бийлиги бул вирустун жайылып кетүү коркунучун алдын алуу иштерин жүргүзө баштады", - деп билдирген өлкөнүн Саламаттыкты сактоо министрлиги.

Маалымат үчүн: Бүткүл дүйнөлүк ден соолукту коргоо уюму бул вирусту Aedes түркүмүндөгү чиркейлер алып жүрүшөрүн аныктаган. Бирок адамдан адамга жыныстык жол менен жуккан учурлар да белгилүү (аталган чиркей вирустуу Денге оорусун да таратат). Вирус биринчи жолу 1947-жылы Уганданын (Африка) Зика токоюндагы макак-резустарда (маймыл түрү) кездешкендиктен Зика аталышын алып калган. 2015-жылы Түштүк жана Борбордук Америкада активдүү жайыла баштаган.

Автор: Гүлжан Асанкожоева