Тоолуу Чаткал районунда кышка карата даярдык көрүлүп, көмүр ташуу иштери башталды

Чаткал районунда кышка карата даярдык көрүлүп, көмүр ташуу иштери башталды. Бул тууралуу бүгүн, 13-сентябрда SUPER.KG порталына Чаткал районунун администрациясынын сектор башчысы Тимур Аликеев билдирди.

"Райондун аймагындагы социалдык мекеме-ишканаларды жана мектептердин жылуулугун камсыздоо максатында көмүр ташуу боюнча тендер өткөрүлдү. Учурда көмүр ташып келүү иштери кызуу жүрүүдө. Чаткал айыл өкмөтүнө 103 тонна, Терек-Сай айыл өкмөтүнө 75 тонна, ал эми Каныш-Кыя айыл өкмөтүнө 254 тонна көмүр ташылып келинет", - деп билдирди Аликеев.

Маалыматка ылайык, Сумсар айыл аймагы өзүн өзү каржылай албагандыктан, аталган айыл өкмөтүнө 50 тонна көмүр республикалык бюджеттин эсебинен ташылат. "Бүгүнкү күндө Сумсар айылына көмүр ташуу боюнча каражат маселеси чечилбей жатат. Бирок келишимдер түзүлүп, документ иштери такталган", - деп кошумчалады Аликеев.

Чаткал районуна көмүр 350 чакырым аралыктагы Таш-Көмүр шаарынан ташылып келинет. Жылуулукту камсыздоо иштери сентябрь айынын аягында жыйынтыкталат. Чаткал районуна жалпысынан 482,8 тонна көмүр ташылмакчы.

Автор: Акназар Сулайманкулов
Фото: Интернеттен алынды