Өмүрбек Текебаев: "Атамбаевдин ондогон гектар жерлери, миңдеген чарчы метрди ээлеген имараттары бар"

Жогорку Кеңештеги "Ата Мекен" фракциясынын лидери Өмүрбек Текебаев мамлекет башчы Алмазбек Атамбаевдин жана президенттин айланасындагылардын (Фарид Ниязов, Икрамжан Илмиянов, Сапар Исаков, Албек Ибраимов) акыркы 10 жыл ичиндеги декларацияларын көрсөтүү суроо-талабы менен тиешелүү мекемелерге кайрылды. Бул тууралуу Текебаев 23-сентябрда SUPER.KG порталына билдирди.

"Бул суроо-талап менен тиешелүү мамлекеттик кызматтарга бүгүн кайрылдым. Баарыбыздыкын салыштырып көрсөтөбүз. Албек Ибраимовдун аялынын жериндей менин аялымдын 100 гектар жери жок. Ибраимовдун 30 чакты жер тилкеси бар: эң кичинекейинин аянты 1,5 гектар болсо, эң чоңунуку 7 гектар экен. Кечээ Мамлекеттик каттоо кызматынын жетекчиси Тайырбек Сарпашевге Ибраимовдун менчигиндеги объектилердин тизмесин сурасам, бербейм деп койду", - деди Текебаев.

"Атамбаевдин ондогон гектар жерлери, миңдеген чарчы метрди ээлеген имараттары бар. КТРК ушуларды деле көрсөтүп койсо болот. Керек болсо мен саналган объектилеримди журналисттерге көрсөтүп берем", - деп айтты Текебаев.

Автор: Жамалидин Парманкулов