ЖЫЛНААМА, 3-ДЕКАБРЬ: Ырчы Неля бүгүн туулган күнүн жакындары менен тосуп, достору менен башка күнү белгилейт

Бүгүн, 3-декабрда ырчы Неля 33 жашка толуп жатат. Бул күндүн күнөөкөрүн куттуктап байланышка чыкканыбызда, конок тосуп жатканын айтты. Ал өздүк майрамын жакындары менен тосуп, кечке маал дагы конок келерин кошумчалады.

"5-6 жылдан бери туулган күнүмдү шеринелеш досторубуз менен өзгөчө тематикада өткөрүп келчүбүз. Бул салтка айланып калган. Быйыл шеринеге катышкандар Бишкекте болбой, колдору бошобой, 12-декабрга жылдырдык. Бүгүн болсо жакындарым менен үйдө тосмой болдум. Эртеден бери куттуктоолор келип жатат. Жолдошум да өзгөчө куттуктап сүйүнттү", - деди ырчы.

Ал эми ырчынын жолдошу Урмат Усенов жубайын Instagram баракчасын аркылуу куттуктап, ага ыраазычылык билдирген.

"Бүгүн биздин үйдө өзгөчө күн, достор! Бүгүн түгөйүмдүн туулган күнү. Кубанычта, кайгыда, өйдөдө, ылдыйда мени менен чогуу болуп, Жаратканымдын каалоосу менен бизге бир уул, бир кызды тартуулаганың үчүн сага рахмат! Азыр экөөлөп жогору карай түртүп бара жаткан арабабыз, буюрса, белге чыкса, төмөн карай өзү зуулдаганда, ичине үй-бүлөбүз менен түшүп алып ырахатын сезер күн бар экенине ишенем. Мага канат болуп, үйдө күтүп алар жан сенсиң. Кудайым сага ден соолук, өмүр, орток бакыт берсин ылайым! Мага дайым күлкү тартуулаганга болгон аракетиңди билем, сезем. Биздин бактыбызга бар бол. Дагы бир жолу туулган күнүң менен, кабыргам!" - деген Усенов.

3-декабрдын жылнаамасы.

Автор: Үмүт Абдраимова