ЖЫЛНААМА, 3-ФЕВРАЛЬ: Мындан 35 жыл мурун украиналык ырчы жана актриса Вера Брежнева төрөлгөн

Мындан 35 жыл мурун, 1982-жылы 3-февралда украиналык ырчы жана актриса Вера Брежнева (чыныгы фамилиясы – Галушка) Леонид Ильич Брежневдин мекени болгон Днепродзержинск шаарчасынын чет жагында төрөлгөн. Атасы менен апасы ошол эле шаарчанын химиялык заводунда эмгектенишкен.

Вера Брежнева мектепти бүткөндөн кийин анын “юрист болом” деген тилеги ишке ашпай, экономика бөлүмүнө сырттан окууга өткөн. Днепропетровскидеги Инженерлер институтуна тапшырып жатканда Вера көпчүлүктүн назарын бурган суйкайган сулуу кыз болгон. 2002-жылы ал “Днепропетровск сулуусу” сынагына катышууну чечип, сынактын алгачкы турларынан өтүп кеткен. Бирок жеңишке келаткан кызга “ВИА-Гра” тобунун кастингге чакырган сунушу жагып, сынактын аягына жетпей топко кошулуп, ырчы болуп калган.

Вера 2003-жылы топ менен кошо Киев шаарына келип, топтун жетекчилери Веранын Леонид Ильич төрөлгөн шаарчадан экенин билгенде, “эми сенин фамилияң Брежнева болот” дешип ага жаңы фамилия беришкен.

2007-жылы аталган топтон биротоло кетип, жеке карьерасын баштаган.

3-февралдын жылнаамасы.

Автор: Үмүт Абдраимова