ТИМ: "Түркиядагы жер титирөөдөн жабыркагандардын арасында Кыргыз жарандары жок"

Мейманканаларга жайгашкан туристтер эшикке чыгып, ачык асман алдында тамактануучу жайларда уктоого аргасыз болушууда.

"20-июлдан 21-июлга караган түнү Түркиянын Бодрум шаарындагы жер титирөөдөн жабыркагандардын арасында Кыргыз жарандары жок".

Мындай маалыматты бүгүн Тышкы иштер министрлигинин маалымат кызматы Түркиядагы өкүлчүлүк берген маалыматка таяп билдирди. "Түркиянын Бодрум шаарындагы тийиштүү кызматтар менен байланышта болуп, жаңы маалыматтарды алып турабыз", - деп жазылат маалыматта.

Эске салсак, Греция менен Түркияны чектештирип турган Эгей деңизинин жээктеринде күчтүү жер титирөө 20-июлдан 21-июлга караган түнү катталган. АКШнын Геологиялык кызматы маалымдагандай, зилзаланын күчү 6,7 баллга жеткен. Жер титирөөнүн аймагы Түркиянын Бодрум курорттук шаарынын түштүк-батышынын 10,3 чакырымынан Грециянын Кос аралынын 16,2 чакырым аралыгында катталган дешүүдө. Ал эми очогу болсо деңиздин 10 чакырым тереңдигинде орун алганы болжолдонду. Кырсыктан Грецияда 2 адам каза болуп, 3 адамдын абалы оор, 120дай адам жаракаттарды алышкан. Мындан Тышкары Түркиянын Бодрум шаарында 70тен ашык адам ооруканага жеткирилген.

Автор: Гүлжан Асанкожоева
Фото: Интернеттен алынды