Орусиянын Пермь шаарындагы кыргыз мигранттарынын кыргызстандыктарга кайрылуусу

Орусиянын Пермь шаарындагы "Кыргызстандыктар союзу" коомунун төрагасы Асылбек Алымкулов аталган шаарда иштеп жаткан кыргыздардын атынан Кыргызстанда болуп жаткан окуяларга байланыштуу кайрылуу жасады. Бул тууралуу “Замандаш” ассоциациясынын басма сөз кызматы билдирет. Кайрылуунун мазмуну төмөндөгүдөй:

"Урматтуу мекендештер! Азыр Кыргызстанда болуп жаткан баш аламандык окуялар бир гана Кыргызстанда жашаган элдерди эмес, башка өлкөлөрдө жашаган мекендештердин жүрөгүн оорутпай койбойт. Кыргызстанда буга чейин канча пикеттер жана митингдер болуп өттү. Ошол митингдердин аягында кырчындай жигиттерибиздин өмүрү кыйылып, канча деген ата-энелер балдарынан, наристелер аталарынан ажырап, жетим калып, зыркырап ыйлап отурушат.

Урматтуу кыргыз элим, ойлоно турган мезгил келип жетти. Бул митингдердин аркасында бирөөлөр турганы бардык элге дайын болуп турат. Биздин элге бир гана тынчтык, достук жана ынтымак керек. Ар бир Ысык-Көлгө барган турист кооздугуна суктанып, башка жакка барбашын айтып, сезон башталып отурганда бул нерсени тез арада токтотуш керек. Жараткан өзү элиме ыйман, сабырдуулук берсин".

Автор: Мээрим Жеңишбек кызы