Албек Ибраимов өзүнүн кызматтан кетүүсү боюнча арыз жазган же жазбаганы боюнча депутаттын маалыматына кызыкты

Бүгүн, 25-апрелде Бишкек шаардык кеңешинин "Республика-Ата Журт" фракциясынын отурумунда мэр Албек Ибраимов отчёт берүүдө.

Анда депутаттар вице-мэрлерди залдан чыгуусун жана жалгыз мэрдин калуусун талап кылышты. Калаа башчысы фракция алдында отчёт берүүгө мыйзам боюнча милдеттүү эмес экенин, бирок суроолорго жооп берүүгө даяр экенин айтты.

Жыйындын жүрүшүндө Ибраимов фракция мүчөсү Канатбек Мүзүралиевдин журналисттерге мэрдин отставкага кетүү боюнча арыз жазган деп айткандарын окуп берди. "Бул чынбы же калппы?" - деп сурады Ибраимов.

Канатбек Мүзүралиев бул маалыматтарды тастыктап, мэр отставкага кетүү тууралуу арыз жазды деп укканын айтты.

Буга чейин Бишкек шаарынын мэриясынын басма сөз кызматы мэрдин кызматтан кетүү боюнча арыз жазды деген маалымат чындыкка дал келбей турганын билдирген.

Автор: Нургазы Аматов