Өгөй кызын 5 жыл зордуктап жүргөн ата 20 жылга эркинен ажыратылды

Ош облустук соту өгөй кызын 5 жылдан бери зордуктап жүргөн атаны 20 жылга эркинен ажыратты. Бул тууралуу Ош облустук сотунун басма сөз кызматы билдирди.

"Кечээ, 26-апрелде Ош облустук соту өгөй кызын 5 жылдан бери зордуктап жүргөн айыпталуучу Б.Ж.ны Кылмыш-жаза кодексинин 129-беренеси (зордуктоо) менен 20 жылга эркинен ажыратып, жазасын күчөтүлгөн тартиптеги абакта өтөөсү көрсөтүлдү. Ошондой эле бул чыгарылган өкүм акыркы эмес жана өкүмгө нааразы тарап көзөмөл иретинде Жогорку Сотко даттанууга укуктуу", - деп билдирди басма сөз кызматынан.

Эске салсак, өгөй кызын 5 жылдан бери зордуктап жүргөн атага 2018-жылдын 27-февралында Өзгөн райондук соту өгөй атаны күнөөлүү деп таап, 15 жылга эркинен ажыраткан. Бирок жабыркаган кыздын таежеси Ош облустук сотуна апелляциялык тартипте даттануу келтирип, соттолуучунун жазасын оордотуп берүүнү суранган. Соттук териштирүүлөрдө айыпталуучу Б.Ж. күнөөсүн моюнуна алган эмес, бирок анын кылмыштык иш-аракеттери боюнча күбөлөрдүн көрсөтмөлөрү, соттук-медициналык экспертизанын корутундусу, беттештирүү протоколдору жана башка иштин ичиндеги материалдары менен аныкталган. Ал эми жабырлануучу кыз таенесинин колунда болуп, төрөлгөн ымыркай балдар үйүнө тапшырылган. Бирок кыздын энеси жолдошу менен ажырашпастыгын, ага доосу жок экенин айтып чыккан.