Лейлек районунун бир катар айылдарында сел жүрдү

Баткен облусунун Лейлек районундагы Маргун, Бешкент, Кулунду айыл аймактарында нөшөрлөгөн катуу жаандан улам сел жүрдү. Бул тууралуу Лейлек районунун мамлекеттик администрациясы SUPER.KG порталына билдирди.

Маалыматка ылайык, сел кечээ, 14-июнда болжол менен таңкы саат 7:30да болгон.

"Маргун айыл аймагынын Дархум айылында 2 сайдан сел жүрүп, ички жолдорду жууп кеткен. Азыркы учурда каттам калыбына келтирилди. Ал эми Бешкент айыл аймагынын Эски-Оочу, Кайрагач, Бешкент айылдарынан сел жүрүп, Эски-Оочу айылындагы 4 үйдү сел каптап, 5 үйдүн чарбалык курулуштарына, огородуна сел каптаган. Кулунду айыл аймагында Интернациональ, Кулунду, Раззаков, Ак-Арык айылдарында сел жүрүп, Интернациональ айылында 3 үйгө, Раззаков айылында 3 үй, 6 чарба курулуштарын сел каптаган. Ички жолдор бузулган", - деди администрациядан.

Учурда ӨКМнын кызматкерлери менен биргеликте зыяндар такталууда.

Автор: Айсалкын Качкынбекова