Тайырбек Сарпашовго карата козголгон кылмыш иш боюнча тергөөнү Башкы прокуратура кайра баштады

Мамлекеттик каттоо кызматынын мурдагы башчысы, экс-вице-премьер-министр Тайырбек Сарпашевдин аты аталган кылмыш иши боюнча тергөөнү Башкы прокуратура кайра баштады. Бул тууралуу Башкы прокуратуранын басма сөз кызматы кабарлады.

Маалыматка караганда, ага карата 2017-жылдан бери козголгон кылмыш иши токтоп турган.

"Бул боюнча иш кайра башталып, Экономикалык кылмыштарга каршы күрөш боюнча мамлекеттик кызматка өткөрүлүп берилген. Азырынча эч кимге айып коюла элек", - деп билдирди Башкы прокуратуранын басма сөз кызматы.

Башкы прокуратура 2017-жылдын февраль айында Сарпашевдин Максим Бакиевдики делген Скрябин көчөсү 45-45-а дарегинде жайгашкан жердин аресттен чыгып, сатылып кетишине себепчи болгонун жүйө келтирип, аны Мамлекеттик каттоо кызматынын башчылыгынан бошотуп турууну сунуштаган. Мындан улам мекемелер аралык комиссия түзүлгөн. Ал эми июнь айында Сарпашев өз ыктыяры менен кызматынан кеткен.

Ошондой эле Сарпашевге 2013-жылы вице-премьер-министр болуп турганда Мамлекеттик каттоо кызматындагы тендерде жеңилген компаниядан жарандын туулгандыгы тууралуу күбөлүктөрдүн бланктарын сатып алууга уруксат берген деген да айып тагылган. Кийин УКМК курамында кылмыштын белгилери жок деп бул кылмыш ишин токтоткон.

Автор: Айсалкын Качкынбекова