ЖЫЛНААМА, 2-НОЯБРЬ: "Айрис" сериалындагы ырайымсыз кыздын образы аркылуу таанылган корей актрисасы Ким Со Ён 38 жашка чыкты

"Сун Чжонго ашык болуу" сериалында Ким Со Ён башкы ролдордун бирин белгилүү актёр Жоң Кёң Хо менен чогуу аткарган.

"Орус кофеси" тарыхый тасмасынан.

Бүгүн корей экранын өжөрлүгү менен багынткан актриса, модель Ким Со Ён 38 жашка чыкты. Ал 1980-жылы Түштүк Кореянын Сеул шаарында төрөлүп, көпчүлүккө "Обо эне жөнүндө" жана "Айрис" сериалдарындагы ролдору менен белгилүү.

Бала чагы

Келечектеги корей сериалдарынын жылдызы кичинекей кезинен тарта өжөрдүгү менен айырмаланып, 14 жашында ата-энесинин уруксаты жок сулуулар сынагына катышып, баш байгени жеңип алат. Ал өз эскерүүсүндө: "Башка кыздарга окшоп апам менен келбегендиктен, сахнага көзүмдү кадимки маркер менен боёп анан чыгып кеткем", - деген. Сынакта жюрилердин көзүнө илинип, балдарга арналган телешоу берүүлөргө чакыруу ала баштаган.

Карьерасы

Алгачкы жолу 1994-жылы "Динозавр мугалим" аттуу сериалга тартылып таанымал боло алган. Андан ары да ар кандай дорама жана тасмаларга чакырылган. Бирок 2000-жылы чыккан "Обо эне жөнүндө" аттуу сериал актрисаны Кореяда гана эмес, чет өлкөлөргө да тааныткан. Со Ён алгачкы тасмаларда таш боор кыздын образын ийине жеткире жараткандыктан, ага кийин да жалаң ырайымсыз кыздардын ролдорун сунушташкан.

Актрисага атактуулук алып келген сериалдардын дагы бири 2009-жылы чыккан "Айрис" сериалы. Ал үчүн бүгүн туулган күнүн белгилеп жаткан каарманыбыз чачын кыска кырктырып, бир нече ай спорт менен активдүү машыгып, түндүк кореялык тыңчынын ролун алган.

«Айрис» тасмасынан кадр

2010-жылдан кийин "Татынакай прокурор", "Афина: Согуш Кудайы", "Айрис 2", "Романтикага муктажмын 3" сериалдарына тартылган. 2012-жылы "Орус кофеси" тасмасында япониялык шылуун кыздын образын чеберчилик менен жараткан.

«Сун Чжонго ашык болуу» тасмасынан кадр

Ал эми 2015-жылы жарыкка чыккан "Сун Чжонго ашык болуу" аттуу дорамада сүйүүнүн өзгөчө окуясына туш болгон катчы кыздын ролун ачып берет. Анда жумуштагы башчысынын ага болгон көңүлүн байкайт. Кызыгы, башчы кызды өз эрки менен эмес, жакында гана алмаштырган жүрөгүнүн ээсинин каалоосу менен жактырып калат.

Сулуу корей актрисаларынын алдыңкы катарын толуктаган Со Ён тасмага тартылууга түшкөн сунуштардын айрымдарына гана макул болору көп айтылат. Андыктан ал фильм жаатында аз, бирок саз образдарды жараткан.

2016-жылы "Бактылуу үй" сериалына тартылган. Чыгармачылыктан тышкары модель катары эмгектенет.

Жеке жашоосу

2017-жылы Ким Со Ён сүйүктүүсү, актёр Ли Сан Уга турмушка чыккан. Экөө "Бактылуу үй" сериалына тартылуу учурунда таанышкан.

Жолдошу Ли Сан У менен