ЖЫЛНААМА, 6-НОЯБРЬ: Кыргыз Республикасынын Эмгек сиңирген артисти Алина Жетигенова 54 жашын жакын адамдарынын курчоосунда белгилейт

Бүгүн, 6-ноябрда Кыргыз Республикасынын Эмгек сиңирген артисти Алина Жетигенова 54 жашка толду. Үй-бүлөдө сүйүктүү жар, мээримдүү эне, сахнанын ажарлуу айымын туулган күнү менен куттуктап байланышка чыкканыбызда, SUPER.KG порталына ыраазычылыгын билдирип, бүгүнкү күнгө койгон пландары менен бөлүштү.

"Туулган күнүм 5-ноябрдан 6-ноябрга караган түнү сааттын жебеси 12ни какканда эле башталган. Неберелерим, балдарым, жакын адамдарым ар кандай күтүүсүз белектерди тартуулап маанайымды көтөрүштү. Азыркы учурга чейин куттуктоолордун аягы суюла элек. Учурда үйдө үй-бүлөм менен бирге майрамдап жатабыз. Ал эми кечинде келе турган коноктордун саны көп болгондугуна байланыштуу шаардагы эс алуучу жайлардын бирине барып туулган күндү улантабыз", - дейт Алина Жетигенова.

Ырчынын "Супер-Инфо" гезитине берген маегинен үзүндүлөр:

"Мен 1982-жылдан тартып ырдап чыктым. Негизи ал убакта эстрада ырчылары аз болгону менен, өтө күчтүү ырчылар бар болчу. 1991-жылдары Айчүрөк Иманалиева, Мерген Турган, Динара Акулова, Расул Маматкулов менен бирге элге тааныла баштадык. Мен башкаларга салыштырмалуу көбүрөөк кароо-сынактарга катышып калгандыктан, эч ким менен атаандашкан жокмун".
"Ырларымды Айдана Дека, Асел Кадырбекова, Чолпон Талипбек жана башкалар аткарып жүрүшөт. Ырлардын автору мен эмес, ошентсе да кыздар мага кайрылып, уруксат сурашкан. Ага абдан ыраазы болдум. Алар таланттуу кыздар, эч кандай каршылыгым жок. Башкача айтсам, ырларды башкалардан кызганбайм. Ыр деген жашаш керек. Балким, алар менден да жакшы аткарып чыгышат".
"Гүлшайыр (ред. Садыбакасова) эжеге окшош болсом бардык жагынан тыкан болмокмун. Ал кишиден бир канча жаш кичүү экениме карабай, телефондун, компьютердин функцияларын өздөштүрө албай ар кимден суранып басып жүрөм. Бул жагынан Гүлшайыр эжеме окшошмун деп коём. Клара (ред. Алибекова) да мага окшоп чоюлуп сүйлөйт эмеспи, бирок өзү таза, жулунбаган кыз. Ага окшоп кээде оюмду толук айта албай калам го дейм. Мектептен кыздар менен урушуп кеткенде, каяша айта албай, ак болсом да күнөөлүү болуп кала берчүмүн".

Алина Жетигенова Таластын Арал айылында 1964-жылы 6-ноябрда төрөлгөн. Мектепти аяктаган соң филармониянын алдындагы эстрадалык студияга кирген. Окуп жүргөндө Асылбек Рысалиевдин "Жетиген" тобунда ырчы болуп, "Бозойго" аттуу ыры менен Алина деген аты эл оозуна алынган. Окууну аяктагандан кийин филармониядагы "Ариет", "Таазим" музыкалык топторуна кирген. Ал убакта ырчынын "Дасторкон", "Апама кат" деген ырлары хит болгон.

Алина Жетигенова "Кыздын сыры", "Арген", "Ал мен эмес", "Жаз" аттуу ырлары менен элдин жүрөгүнөн түнөк тапкан.