ЖЫЛНААМА, 17-ЯНВАРЬ: 38 жашка толгон ырчы Замир Арыкбаев: "Туулган күнүмдү үй-бүлөмдүн курчоосунда, жайылган дасторкондун үстүндө тосом"

Бүгүн эстрада жана фольклор ырчысы Замир Арыкбаев 38 жашка толду. Ал 1981-жылы 17-январда Ысык-Көл облусуна караштуу Тоң районундагы Көк-Мойнок айылында мугалимдин үй-бүлөсүндө төрөлгөн. Беш бир туугандын ортончусу.

Ырчыны өздүк майрамы менен куттуктап, ага байланышканыбызда ыраазычылыгын билдирип, төмөндөгүлөргө токтолду: "Алгач жубайым саат 12ден өткөндөн кийин куттуктады. Андан соң апамдан куттуктоо сөздөрү келди. Азыркы учурда жумуштар менен эле жүрөм. Быйыл туулган күнүмдү үй-бүлөмдүн курчоосунда, жайылган дасторкондун үстүндө өткөрөбүз".

Замир Арыкбаев туулган жеринен билим алган соң 1998-жылы Кыргыз мамлекеттик курулуш, транспорт жана архитектура университетинин транспорт факультетине тапшырып, аны 2003-жылы аяктаган. Ырчы 5-курста окуп жүргөн учурда Консерваториянын фольклор бөлүмүнүн даярдоо курсуна тапшырат. Бирок чыгармачылыкка алаксып, бул окуусу калып калат.

Колунан комузун түшүрбөй фольклор, ошондой эле эстрада жаатында да активдүү болгон Замир Арыкбаев көпчүлүккө "Кудача кыз", "Даткайым", "Көлдүк карындаш" жана башка ырлары менен белгилүү болгон. Андан сырткары ырларга текст жазып, обон жаратып жүрөт.