"Жакында КСДПнын катары жаңы жүздөр менен жаңыланып, тазаланып, партия мурдагыдан дагы күчтүү болот" дейт жарандык активист Алга Кылычов

Коммерциялык эмес IRI уюмунун 2018-жылы жүргүзгөн сурамжылоосунун жыйынтыгында, КСДПга болгон элдин ишеними төмөндөп кеткени белгилүү болду. Тактап айтканда, сурамжылоого катышкандардын 18 пайызы КСДПны колдой турганын билдирген. Ушул эле уюмдун мындан 4 жыл мурун жүргүзгөн иликтөөсүндө бул көрсөткүч 22 пайызды түзгөн.

Бүгүн, 22-февралда КСДПнын жыйыны өтүп, партия мурдагыдай таасирдүү болбой, анын катары суюлуп жаткандыгы боюнча сөз козголду. Буга партия өкүлдөрү кезинде өз кызыкчылыгын көздөп партияга киргендер эми артын салып кетишкенин айтышты. Жыйындын башталышына Алмазбек Атамбаев да катышып, өз сөзүндө "эң кыйын кездерде да партия күчүн сактап кала алат" деп айтты.

Буга байланыштуу SUPER.KG порталы "Парламенттик шайлоодо КСДП мурдагыдай лидерлик позициясын сактай алабы?" деген собол салды.

Жарандык активист Алга Кылычов бул суроого жооп берип, КСДПнын мартта өтө турган съездинде бардыгы белгилүү болот.

“Жакында КСДПнын катары жаңы жүздөр менен жаңыланып, тазаланып, партия мурдагыдан дагы күчтүү болот. Март айында өтө турган съездинде бардыгы белгилүү болот. Азырынча ушуну гана айта алам. Ал эми иликтөө боюнча КСДП айрым партиялардан артта калып калганы тууралуу айтсам, кеп ким кандай иликтегенинде. Бирок бул КСДП фракциясынын депутаттары боюнча болсо макул боло алам”, - дейт Кылычов.

Саясий илимдердин доктору Жолборс Жоробеков, саясий серепчи Игорь Шестаков, саясат таануучу Сейтек Качкынбаев, Жогорку Кеңештин экс-депутаты Алишер Мамасалиев, жарандык активист Адил Турдукуловдун пикирлерин бул топтомдон окуңуз.

Автор: Жылдыз Джускембаева