Ирина Карамушкина: "Иса Өмүркулов айткан 3-апрелдеги КСДПнын съезди болбойт, бул калп"

Бүгүн, 5-мартта КСДП партиясы кеӊсесинде маалымат жыйын берип жатат. Буга партиядан чыгарылган Жогорку Кеңештин депутаты Иса Өмүркуловдун билдирүүсү себеп болду. КСДП фракциясынын лидери Өмүркулов КСДП 3-апрелде кезектеги съездин өткөрүү чечимин кабыл алгандыгын, партиянын жетекчилерин алмаштыруу жана башка маселелерди съезддин катышуучулары чечерин айткан.

Маалымат жыйынына катышып жаткан депутат Ирина Карамушкина: "Иса Өмүркуловдун КСДПнын бир дагы саясий кеңешине жана съездине катышууга укугу жок. Ал партиялык жыйындарга дагы катыштырылбайт. Өмүркулов партиянын атайын чакыруусу менен гана катышуусу мүмкүн. Өмүркулов айткан 3-апрелдеги КСДПнын съезди болбойт, бул калп. Ал өзүнүн тарапташтары менен кандайдыр бир чогулуштарын өткөрүшү мүмкүн, бирок ага КСДПнын эч кандай тиешеси жок. "КСДП Атамбаевсиз" кыймылы дагы биздин партияга тиешелүү эмес", - деди.

Ошондой эле ал КСДПнын съезди ушул жылдын 6-апрелинде боло турганын, бул дата 2018-жылдын 31-октябрында бекитилгенин кошумчалады.

Буга чейин партиянын төрагасы Алмазбек Атамбаев, депутат Ирина Карамушкина, Асел Кодуранова маалымат жыйын өткөрүп, партиянын шаардагы жыйыны март айында, ал эми КСДПнын съезди 6-апрелде болорун айтышкан.

Былтыр 31-октябрда КСДП Иса Өмүркуловду "партиянын негизги максатына жана партиянын жобосуна каршы аракет жасаган" деп өз курамынан чыгарган.

Маалымат жыйындан түз эфирди бул шилтеме аркылуу көрүңүз.

Автор: Наргиза Өмүрбек кызы
Фото: Наргиза Өмүрбек кызы