Башкы прокурор чет жакта жазасын өтөп жаткан жарандардын саны боюнча маалымат берди. Эң көбү Орусияда соттолгондор

Чет өлкөдө жазасын өтөп жаткан Кыргыз жарандарынын саны 1 миң 782ни түзөт. Бул тууралуу бүгүн, 16-апрелде Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин Регламенти боюнча комитеттин жыйынында башкы прокурор Өткүрбек Жамшитов билдирди.

"Кыргыз Республикасынын Тышкы иштер министрлиги берген маалымат боюнча чет өлкөдө соттолуп, жазасын өтөп жаткан жарандардын саны 1 миң 782. Эң көбү Орусиянын аймагында жазасын өтөгөндөр. Алардын саны 1 миң 455, Казакстанда 212, Кытайда 18, Германияда 14, Түркияда 8, Тажикстанда 34", - деди Жамшитов.

Бүгүн комитет жыйынында башкы прокурор өткөн жылы аткарылган иштер боюнча отчёт берди.