Өкмөт эң жогору суроо-талапка ээ 10 адистикти атады (тизме)

Билим берүү жана илим министрлиги менен Эмгек жана социалдык өнүктүрүү министрлиги эмгек ресурстарынын суроо-талабын божомолдоо ыкмасынын негизинде 2018-2022-жылдарга карата адистиктердин суроо-талап картасын жаңылады. Бул тууралуу өкмөттүн басма сөз кызматы билдирди.

Маалыматка ылайык, талдоонун жыйынтыгы боюнча эмгек рыногунда артыкчылыктуу жана суроо-талап жогору адистиктер катары бул мезгилде өнөр жай, билим берүү, курулуш, айыл чарба, медицина тармактары болот.

Бүгүнкү күнү суроо-талап жогору 10 адистикке төмөнкүлөр кирет:

маалыматтык коопсуздук,
маалыматтык-коммуникациялык технологиялар жана байланыш тутуму,
тоо-кен иши,
геологиялык чалгындоо технологиясы,
технологиялык машиналар жана жабдуулар,
медицина,
менеджмент жана маркетинг,
агрардык инженерия,
курулуш,
билим берүү.

2018-жылы кабыл алуу кампаниясынын жыйынтыгы боюнча эң жогорку балл топтогон абитуриенттер төмөнкү адистиктерге жана багыттарга гранттык окутуу боюнча даярдоого кабыл алынган: программалык инженерия, дарылоо иши, продуктулар технологиясы жана коомдук тамактанууну уюштуруу, педиатрия, лингвистика (англис тили), психология, маалыматтык коопсуздук, колдонмо математика жана информатика, медициналык-алдын алуу иши, малдан алынган азыктар технологиясы жана өндүрүшү.

Жыл сайын өкмөт жогорку окуу жайларга 5 705 гранттык орун бөлүп берет.

Өткөн жылы гранттык орундар төмөнкүдөй бөлүштүрүлгөн:

компьютердик технология адистиктери – 485,
өнөр жай – 425,
айыл чарба – 415,
саламаттыкты сактоо – 405,
педагогика – 375,
курулуш – 260,
тоо-кен иштетүү өнөр жайы – 215,
гуманитардык адистиктер – 115,
башкаруу – 95,
транспорт – 90.

Ошону менен бирге кесиптер дүйнөсүндө суроо-талап эң жогору жана кеңири жайылган адистиктер булар: IТ-адиси, долбоорлоочу инженер, окутуучу, юрист, медик, маркетолог, тейлөө кызматы жана эколог кесиптери.

Автор: Нургазы Аматов