Депутат Эльвира Сурабалдиева: "Контейнерден салынган мектепти көрүп капаландым". КҮНСОБОЛ

Социалдык тармактарда контейнер-мектептин ачылыш аземинен тартылып алынган сүрөт талкууга алынууда. Бул 6 контейнерде бүгүнкү күндө 172 бала билим алып жатканы белгилүү болду. Мамлекеттик бюджеттин 20 пайызы жумшалган билим берүү тармагын көпчүлүк сынга алып жатат.

Мындан улам SUPER.KG порталы "Нарындагы контейнер-мектеп талкууга түштү. Бул бюджеттин 20 пайызын билим берүү тармагына жумшаган өлкөгө жараша турган көрүнүшпү?" деген собол салды.

Жогорку Кеңештин депутаты Эльвира Сурабалдиева билим берүү тармагы боюнча нааразычылыктар көп экенин айтты. "Бүгүн билим берүү жана илим министри кызматтан өз каалоосу менен кетти. Контейнерден салынган мектептин айынан көп негатив реакция болуп жатат. Китептерден ката кетип, эл арасында нааразычылыктар болду. Бул маселе парламентте дагы көтөрүлдү. Көйгөйлөр айтылууда, бирок көңүл бурулбай келет. Контейнерден салынган мектепти көрүп капаландым. Билим берүү системине бюджеттен бөлүнгөн каражаттан тышкары насыя, гранттар келет. Мектептерди куруу маселеси каралганда, авариялык абалдагы мектептерге көңүл бурулса жакшы болмок", - дейт Сурабалдиева.