КҮНСОБОЛ: Латын арибине өтүү Кыргыз өлкөсү үчүн келечекте кандай артыкчылыктарды берет? Садык Шер-Нияз: "Латын арибине өтүү Кыргыз мамлекети үчүн эрте"

Кечээ, 11-сентябрда Жогорку Кеңештин жыйынында билим берүү министри кызматына Каныбек Исаковдун талапкерлиги каралып, колдоо тапты. Ал депутаттардын суроосуна жооп берип жатып латын арибине өтүүнү колдой турганын айтты. Жаңы министрдин пикири коомчулук тарабынан кызуу талкууга алынды.

SUPER.KG порталы "Латын арибине өтүү Кыргыз өлкөсү үчүн келечекте кандай артыкчылыктарды берет?" деген собол салды.

Жогорку Кеңештин депутаты Садык Шер-Нияз латын арибине өтүү ааламдашуу мезгилинде артыкчылык бериши мүмкүн деген пикирде. "Анткени азыр бардык нерселер англис тилинде болуп жатат. Бирок ошол эле учурда Орусия тарабынан түшүнбөстүк жаралышы мүмкүн. Латын арибине өтүү Кыргыз мамлекети үчүн эрте. Биз көп жактан илим, билимге орус тили аркылуу кирип жатабыз. Латын арибине өтүү кандайдыр бир саясий тирешүү жаратышы мүмкүн", - дейт Садык Шер-Нияз.