Депутат Карамат Орозова: "Чек ара маселелери боюнча комиссиянын иши тез жүрбөгөндүктөн бүгүнкү күндө чатактар болуп жатат". КҮНСОБОЛ

14-сентябрда Кыргыз-Тажик чек арасында тажик тарап такталбаган жерге курулуш ишин баштаганы тууралуу маалымдалган. Лейлектен Бишкек шаарына келген айылдык кеңештин депутаттары "Баткен районунун үч айыл өкмөтү анклав болгону турат" деп бийликке кайрылуу жасаган. Мамлекеттик чек ара кызматынан аталган аймактагы абал туруктуу деп маалымат тараткан. Ал эми чек ара маселеси боюнча жооп берген вице-премьер-министр Жеңиш Разаков расмий түрдө билдирүү жасабаганы коомчулукта сындалып жатат.

Мындан улам SUPER.KG порталы "Кыргыз-Тажик чек арасынын такталбаган аймагында коңшу өлкө курулуш иштерин үч күндөн бери жүргүзүүдө. Эмне үчүн чек арага жооп берген вице-премьер ушул убакка дейре үн ката элек?" деген собол салды.

Жогорку Кеңештин депутаты Карамат Орозованын айтымында, чек ара маселесин чечүү кечиккен сайын пикир келишпестик окуялар болуп жатат. "Чек арадагы көйгөйдүн көптүгүнөн өкмөттүн чек араларды делимитациялоо маселелери боюнча штат берилген. Чек ара маселелери боюнча комиссия ошол кызматтын карамагында. Комиссиянын ишинин тез жүрбөгөндүгүнөн улам бүгүнкү күндө чатактар болуп жатат. Албетте, чек ара маселеси тез бүтпөйт. Бирок бул маселени чечүү кечиккен сайын ушундай окуя болуп жатат", - дейт Карамат Орозова.