Депутат Улугбек Ормонов: "Мамлекеттик чоң кызматтагылар биринчи кезекте кыргыз тилинде так сүйлөшү керек". КҮНСОБОЛ

Казакстандын Нур-Султан шаарында Евразия өлкөлөрүнүн парламент спикерлеринин IV отуруму өттү. Анда Жогорку Кеңештин төрагасы Дастанбек Жумабеков орусча текстти кыйналып окуганын коомчулук сынга алууда. Ал эми айрым жарандар мамлекеттик тилде эле баяндама жасаса туура болмок деген пикирлерин айтышууда.

SUPER.KG порталы "Жогорку Кеңештин төрагасы орусча текстти кыйналып окуганы катуу сындалды. Мамлекеттин экинчи жүзү болгон адам мамлекеттик тилде сүйлөсө болбойт беле?" деген собол салды.

Жогорку Кеңештин депутаты Улугбек Ормонов орус тилинде туура эмес сүйлөсө баса калган туура эмес деген ойдо. "Түрк парламенттер аралык ассамблеянын жыйынында мамлекеттик тилде сүйлөгөн жакшы. Евразия өлкөлөрүнүн парламент спикерлеринин отурумунда котормо тууралуу тактап бериштиби билбейм. Кавказ аймагында жашаган элдер орусчаны өздөрүнүн тилине ыңгайлаштырып сүйлөшсө сыймыктанышат. Биз болсо кыйкырып, баса калып жатабыз. Ар бир киши орус тилинде так сүйлөшү керек деген талап жок. Мамлекеттик чоң кызматтагылар биринчи кезекте кыргыз тилинде так сүйлөшү керек. Андан кийин орус тилинде, англис тилинде сүйлөсө болот", - дейт Ормонов.