Укук коргоочу Динара Ошурахунова: "Батукаевдин бошотулушу боюнча иш сотто жабык каралышына эч кандай себеп жок". КҮНСОБОЛ

Президент Сооронбай Жээнбеков эми соттук процесстин баары ачык-айкын боло турганын айтып келген. Соттук отурумдар мурдагыдай көмүскө болбойт деп билдирген. Кримтөбөл Азиз Батукаевдин бошотулушу боюнча иш сотто жабык өтө турган болду.

Мындан улам SUPER.KG порталы "Буга чейин Сооронбай Жээнбеков соттук иштердин баары ачык өтөт деген эле. Бир адамдын өмүрүн алып, 20дай жарандын тагдырын чече турган Азиз Батукаевдин бошотулушу боюнча иш сотто жабык карала турган болду. Коом үчүн маанилүү ушундай соттук процесс эмне үчүн жабык каралышы керек? Коомчулуктан жаап-жашыра турган маселе барбы?" деген собол салды.

Укук коргоочу Динара Ошурахунова соттун жабык өтүшү туура эмес деген пикирде. "Батукаевдин бошотулушу боюнча коомчулуктун кызыкчылыгы абдан чоң. Аны ким чыгарды эле, мамлекеттик органдар буюртмаларды кантип аткарганын баарыбыз билишибиз зарыл. Сот ачык өтүшү керек. Батукаевдин бошотулушу боюнча ишти жабык кароого эч кандай зарылчылык жок. Бул жерде аскердик, мамлекеттик сыр жок. Ошон үчүн Башкы прокуратура бул сот ачык каралышы керек деген оюн айтышы шарт", - дейт Ошурахунова.