Депутат Азамат Арапбаев: "Акча которууга чектөө маселесинде саясаттын тиешеси жок". КҮНСОБОЛ

Быйыл апрель айында Орусиядан Кыргыз мамлекетине акча которууга айына 100 миң рубль көлөмүндөгү чектөө киргизилген. Өткөн аптада Москва шаарында Евразиялык өкмөттөр аралык кеңештин кезектеги жыйыны өтүп, ага премьер-министр Мухаммедкалый Абылгазиев катышты. Анда кыргыз тараптан чектөөнү алып салуу боюнча демилге көтөрүлгөн. Бирок эч кандай чечим кабыл алынбай, бул маселе Евразия өкмөт аралык кеңешинин кийинки жыйынында карала турган болду.

SUPER.KG порталы "Орусия Кыргыз өлкөсүнө акча которууга киргизген 100 миң рубль көлөмүндөгү чектөөнү күчүндө калтырды. Бул ЕАЭБдин экономикалык эмес, саясий максатта түзүлгөнүнүн далилиби?" деген собол салды.

Депутат Азамат Арапбаев Орусиянын бул кадамы саясий эмес, экономикалык эле чечим болду деген пикирде.

"Менин оюмча, Орусия акча которуу боюнча чектөөлөрдү коюп жатат ЕАЭБден чыгыш керек, нота жөнөтүш керек" деген пикирлер туура эмес. Мамлекеттик деңгээлдеги маселеге келгенде бардыгын мыйзам чегинде, кызуу кандуулукка алдырбай чечиш керек. Бул жерде бардык нерсени ЕАЭБге байланыштыра бербеш керек. Анын алкагында мамлекет өзү эч чектөөсүз которууларды жүргүзө берет. Бул мыйзам жеке жактарга гана тиешелүү. Ал эми лимит боюнча, ал ар бир мамлекеттин акча которуу индексине жараша коюлган. Азыр бул жагдайдан чоң маселе жасап, саясатташтырып жиберүүнүн кереги жок", - деди ал.