Депутат Момбеков Кой-Таш окуясын иликтеген комиссиянын мүчөсүнө: "Убакыт келгенде бул комиссиянын үстүнөн иликтеген комиссия болот"

Бүгүн, 12-декабрда Жогорку Кеңеште Кой-Таш окуясын иликтеген мамлекеттик комиссиянын жыйынтыгы каралып жатат.

Анда депутат Рыскелди Момбеков комиссиянын жыйынтыгына нааразы болду.

"Мен 2005-жылы революцияга катышкам. Керек болсо башында болгом. 2010-жылы революциянын башында болбосом да арасында болгом. Бирок Кой-Таштагы коогалаңда болгон эмесмин. Менин атымды кошуп койгон экенсиңер. Мен Атамбаевге болушпайм, акыйкатка болушам. Ирина Карамушкина менен Асел Кодуранова милдеттерин аткарбай үнсүз макулдуктарын берди деп айттыңыз. Далилдеп бериңизчи", - деп Момбеков Тынчтык Шайназаровго кайрылды.

Шайназаров: "Адамдардын күнөөсү бар же жоктугуна тергөө баа берет. Бул жерде маалымат каражаттарынан, тергөө органдарынан алынган маалыматтар боюнча комиссиянын корутундусу дайындалган. Бүгүнкү күндө Карамушкина менен Кодуранованын макамы аныкталган. Алар кылмыш ишинде айыпкер катары аныкталган. Үй камагына алынышкан. Тергөө амалдары жүрүп жатат", - дейт.

Момбеков: "Кыргыз мамлекетинин эли эмне болгонун жакшы билет. Эки жолку революцияга катышканымды мойнума алып жатам. Ошол боюнча мени жоопко тартсаңар болот. Бул жерде отурган Аскар Акаев, Курманбек Бакиевдин убагындагы адамдардын бардыгы комиссия түзүп, мени комиссиянын кортундусуна кошуп коёт деп ойлобоптурмун. Убакыт келет ушул комиссиянын үстүнөн иликтеген комиссия болот. Курсан Асановго орден бериш керек болчу. Ким ишенет ушундай корутундуга? Күч түзүмдөрүнүн жетекчилеринин жоопкерчилигин жазып койбопсуңар", - деди.

Шайназаров күч түзүмдөрүнүн жетекчилерин жоокерчилиги боюнча сунушту өкмөткө бергендерин айтты.

Автор: Жылдыз Джускембаева