Укук коргоочу Токтайым Үметалиева: "Кулматовдун сот залынан бошотулганын жеңиш деп айтса болот". КҮНСОБОЛ

Бүгүн, 23-декабрда Бишкек шаарынын Ленин райондук сотунда экс-мэрлер Кубанычбек Кулматов жана Албек Ибраимовдун иши боюнча соттук отурум өттү. Анда Кубанычбек Кулматовго 5 миллион сом айып пул төлөө милдеттендирилип, сот залынан бошотулду. Ал эми Албек Ибраимов 15 жылга эркинен ажыратылды.

Мындан улам SUPER.KG порталы "Кулматов сот залынан бошотулуп, Ибраимов 15 жылга соттолду. Экс-мэрлерге чыккан өкүм калыс болдубу же саясий чечим болдубу?" деген собол салды.

Укук коргоочу Токтайым Үметалиева соттун өкүмү саясий чечим болду деп ойлобой турганын билдирди.

"Кулматовдуку бир эле эпизод менен кетип жатат. Бул орто мектеп боюнча болууда. Туура эмес чечим чыкты деп эсептейм. Далил жок. Мектеп курулуп жатканда, ал мэр болуп иштеген эмес. Ал эл аралык коомдун төрагасы болуп иштеп жаткан. Ал болгону грант боюнча өкмөт чечим кабыл алып жатканда, эки мектепти куралы деп сунуш берген. Ага да карабай 5 миллион сом айып пул салынды. Анын сот залынан бошотулушу эң чоң жеңиш деп айтса болот. Акталганга жол ачылат. Соттун өкүмүн саясий чечим деп ойлобойм. Эч нерсе таппай аргасыздан айып пул салынды", - дейт Үметалиева.

Автор: Жылдыз Джускембаева