5-7-майда туруксуз аба ырайы күтүлөт. Түштүк аймактарда суунун деңгээли көтөрүлүп, сел жүрүү коркунучу бар

Өлкөдө туруксуз аба ырайы орун алып, дарыялардагы суунун деңгээли көтөрүлүп, сел жүрүү коркунучу бар. Мындай билдирүүнү ӨКМнын басма сөз кызматынан кабарлашты.

4-майда түнкүсүн жана 5-7-майда республиканын аймагында туруксуз аба ырайы күтүлөт. Көпчүлүк аймактарда мезгил-мезгили менен жамгыр жаап, күн күркүрөшү, бийик тоолуу райондордо кар жаашы күтүлөт.

4-майда түнкүсүн Ош, Жалал-Абад, Ысык-Көл облустарынын айрым райондорунда, 5-7-майда Ош, Жалал-Абад, Баткен облустарынын кээ бир аймактарында жаан-чачын катуу жаашы күтүлөт. Айрым аймактардагы тоо этектеринде жана тоолуу райондордо мөндүр жаашы мүмкүн. Батыштан соккон шамалдын ылдамдыгы секундасына 4-9 метрден, 15-20 метрге жетиши күтүлөт. Абанын температурасы төмөндөйт.

Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.

4-7-май аралыгында күтүлүп жаткан нөшөрлүү жаан-чачынга байланыштуу Ош, Жалал-Абад, Баткен облустарынын дарыяларында суунун деңгээли көтөрүлүшү күтүлөт, тоолуу жана тоо этектериндеги райондорунда сел жүрүшү мүмкүн.

Автор: Бактыгүл Момбекова