Балбак Түлөбаев: "Бишкекте гуманитардык жардамды туура эмес тараткандарга карата текшерүүлөр жүргүзүлөт"

"Бишкекте гуманитардык жардамдарды туура эмес даректерге тараткандардын үстүнөн арыз жазылды" деди Бишкек шаардык мэриясынын аппарат башчысы Балбак Түлөбаев SUPER.KG порталы байланышканда.

Айтымында, ушул тапта мындай жүйөө менен шаардагы №19 муниципалдык аймактын башчысы кызматынан алынган.

"Биз тараптан, акимиат тараптан 2 жагдайда туура эмес иш жасаган деген шектер жаралды. Анын айрым аракеттеринен улам муктаж болгон үй-бүлөлөр эмес, мурда жардам алган үй-бүлөлөр жардам баштыктарын алып калышкан. Мындан улам укук коргоо органдарына кайрылдык. Ал кызматкер жумушунан алынган, азыр иш козголдубу бизге белгисиз, бирок териштирүү иштери жүрүп жаткан. Ушундай эле шек жараткан дагы 2 кызматкер бар, алар боюнча да арыз УКМКга берилген", - деди Түлөбаев.

Ошондой эле ал мэрия гуманитардык жардамдар калкка адилеттүү жетиши үчүн бардык аракетти көргөнүн, 95 пайызы акыйкат таратылган деп эсептерин кошумчалады.

Автор: Кызжибек Раимова