"Эрдиги унутулбайт!". Улуу Ата Мекендик согуштун дагы бир ардагери дүйнөдөн кайтты

Улуу Ата Мекендик согуштун ардагери Петр Поломошнов 96 жашында дүйнөдөн кайтты. Бул тууралуу Бишкек шаардык мэриясынын маалымат кызматынан билдиришти.

Ага ылайык, Поломошнов 11-июнда көз жумган. Аны акыркы сапарга узатуу зыйнаты аскерлердин коштоосунда өттү. Ал 13-июнда Озерное айылындагы мүрзөгө, өзүнүн маркум аялынын жанына коюлду.

Петр Поломошнов 1924-жылы төрөлгөн. 1942-жылдын август айынан баштап Украинадагы фронтто салгылашкан. 1946-жылы аскерден бошотулган. Пенсияга чыкканга чейин айыл чарба техникалары боюнча мастер болуп иштеген. Ал 3-даражадагы "Даңк", 1-даражадагы "Ата Мекендик согуш" ордендери, "Германияны жеңиш үчүн" медалы жана башка сыйлыктар менен сыйланган.

Автор: Кызжибек Раимова