Легендарлуу маданият министри Күлүйпа Кондучалованы эскерүү аземинен сүрөттөр

Бүгүн, 15-июнь Кыргыз эл баатыры, мамлекеттик жана коомдук ишмер, Кыргыз Республикасынын маданиятына эмгек сиңирген ишмер жана легендарлуу маданият министри Күлүйпа Кондучалованын туулган күнү. Бул күнү “Ала-Арча” көрүстөнүнө ага куран окулуп, гүл чамбар коюлду деп маалымдалды Маданият, маалымат жана туризм министрлиги тарабынан.

Анда билдиришкендей, эскерүүгө маданият, маалымат жана туризм министри Азамат Жаманкулов, маданият тармагынын жоон тобу жана Кондучалованын жакындары катышты. Ошондой эле бул күнү “Маданият. Тарых. Тил” каналы аркылуу Күлүйпа Кондучалованын 100 жылдыгына карата эскерүү күнү онлайн форматында өттү.

Күлүйпа Кондучалова 1920-жылдын 15-июнунда Чүй облусунун Аламүдүн районунун Кара-Жыгач айылында төрөлгөн. Фрунзе шаарындагы педагогикалык окуу жайын, Москвадагы жогорку партиялык мектепти бүтүргөн. 1938-1940-жылдары Нарын районунун Куланак толук эмес орто мектебинде мугалим, окуу бөлүмүнүн башчысы, директор, 1940-1943-жылдары Кыргызстан ЛКЖС Тянь-Шань обкомунун секретары жана башка кызматтарды аркалаган.

1948-1949-жылдары Кыргыз ССР Жогорку Советинин президиумунун секретары, 1947-1949-жылдары партиянын Жалал-Абад обкомунда үгүт жана саясат бөлүмүндө секретарь, 1949-1952-жылдары Кыргыз ССР Жогорку Советинин президиумунун төрагасынын орун басары болгон.

1953-1958-жылдары Кыргыз ССР Министрлер Советинин төрагасынын орун басары жана тышкы иштер министри, 1958-1963-жылдары Кыргыз ССР маданият жана тышкы иштер министри, 1963-1980-жылдары Кыргыз ССР маданият министри, 1980-2003-жылдары Кыргыз Республикасынын тарых жана маданият эстеликтерин коргоо коомунун Борбордук кеңешинин президиумунун төрагасы болгон.

Эл аралык Курманжан Датка сыйлыгынын ээси. Ленин, эки жолу Эмгек Кызыл Туу, «Ардак Белгиси», 1-даражадагы «Манас» ордендери жана медалдар менен сыйланган.

Автор: Кызжибек Раимова
Фото: Маданият, маалымат жана туризм министрлиги