Реалдуу сектор жана каржы жаатында белгилүү консультант Айдар Мокенов каза болду

Реалдуу сектор жана каржы жаатында белгилүү консультант, "Кыргыз почтасы" ишканасынын мурдагы жетекчиси Айдар Мокенов узакка созулган оорудан улам каза болду. Ал 27-июлда көз жумганын анын кызы Бегайым Мокенова жазып чыкты.

Мокенов Айдар Абдразакович 1963-жылы 29-апрелде төрөлгөн. 1985-жылы Москвадагы башкаруу институтунда кибернетикалык экономист адистиги боюнча билим алган.

Эмгек жолун 1985-жылы аталган жогорку окуу жайда окутуучу болуудан баштаган.

1985-1987-жылдары Москвадагы башкаруу институнун экономикалык кибернетика бөлүмүнүн илимий кызматкери;

1987-1988-жылдары Кыргыз ССРнин Айыл чарба министрлигинин агрардык экономика илимий-изилдөө институтунун кенже илимий кызматкери;

1988-жылы Айыл чарба министрлигинин айыл чарба экономикасы илимий-изилдөө институтунун илимий кызматкери;

1989-1991-жылдары КМУнун компьютердик лабораториясынын башчысы;

1991-1992-жылдары "Агропромбанктын" валюта жана биржалык бөлүмүнүн башчысы;

1992-1994-жылдары "Азия-инвест" акционердик коомунун жана "Азия Брок Сервис" ЖЧКсынын төрагасынын биринчи орун басары;

1994-1995-жылдары "Агропромбанктын" алдыңкы экономисти жана Мамлекеттик мүлк фондунун экономикалык кеңешчиси;

1995-1997-жылдары "Акылинвестбанк" башкармалыгынын валюталык операциялар жана баалуу кагаздар бөлүмүнүн башчысы;

1997- жылы "Акылинвестбанк" башкармалыгынын төрагасынын орун басары;

1997-1999-жылдары Улуттук банкта экономикалык кеңешчи;

1999-жылы "Кайрат-Банктын" төрагасы;

1999-жылы президенттик администрациянын коопсуздук жана коргонуу иштери боюнча консультант-эксперти;

1999-2001-жылдары "Кыргызалтын" акционердик коомунун вице-президенти жана президенттик администрациянын экономикалык саясат бөлүмүнүн башчысынын орун басары;

2001-2003-жылдары Банктарды кайра түзүү жана карыздарды реструктуризациялоо агенттигинин директору;

2003-2005-жылдары Каржы министрлигинин алдындагы финансылык полиция департаментинин директору;

2005-жылы өкмөткө караштуу Маалыматтык ресурстар жана технологиялар боюнча мамлекеттик агенттиктин директору;

2008-200-жылдары экономикалык өнүгүү жана соода министринин орун басары;

2012-2013-жылдары Транспорт жана коммуникация министрлигинин алдындагы "Кыргыз почтасы" мамлекеттик ишканасынын башкы директору.

SUPER.KG порталынын эмгек жамааты Айдар Мокеновдун мезгилсиз дүйнөдөн кайткандыгына байланыштуу үй-бүлөсүнүн жана жакындарынын аза кайгысын тең бөлүшүп, терең кайгыруу менен көңүл айтат.

Автор: Бактыгүл Момбекова