Жалал-Абад, Токмок жана Балыкчы шаарлары Кытайдын бир катар шаарлары менен кызматташа баштайт

Бүгүн, 3-сентябрда Кыргыз өлкөсү менен Кытай Эл Республикасынын бир катар шаарларынын ортосундагы өз ара карым-катнашты күчөтүп, тармактар аралык байланышты жандантуу максатындагы онлайн конференция өттү. Бул тууралуу Жалал-Абад шаардык мэриясынан билдиришти.

Ага ылайык, эки өлкөнүн ар тараптуу стратегиялык маанидеги алакаларын бекемдөөдө Кыргыз өлкөсүнөн Жалал-Абад, Токмок жана Балыкчы шаарлары тандалып алынганы, ал эми аларга өнөктөш катары Кытайдын Чжуншань, Хойчжоу шаарлары жана Бишань району тандалганы айтылат.

"Онлайн конференцияга Жалал-Абад шаарынын мэринин биринчи орун басарынын милдетин аткаруучу Руслан Алтышымев катышып, Жалал-Абад шаарынын экономикалык, кайра иштетүү, өнөр-жай жана туристтик потенциалы боюнча маалымат берди. Руслан Алтышымев кызматташуунун алкагында белгиленген тармактарды дагы да өнүктүрүүдөгү мүмкүнчүлүктөр арбын экенин кошумчалады", - деп жазылат маалыматта.

Автор: Бактыгүл Султаналиева