6-8-сентябрь аралыгында өлкөдө туруксуз аба ырайы күтүлөт. Абанын температурасы кескин төмөндөйт

6-сентябрдан 8-сентябрга чейин республиканын аймагында туруксуз аба ырайы күтүлөт. Айрым тоолуу райондордо жааган жамгыр карга айланышы мүмкүн экенин ӨКМнын маалымат кызматынан кабарлашты.

Чүй, Жалал-Абад, Ысык-Көл, Нарын облустарынын көпчүлүк аймактарында, Талас, Ош, Баткен облустарынын кээ бир райондорунда мезгил-мезгили менен жаан жаап, күн күркүрөшү, тоолуу райондордо жаан карга айланышы, бийик тоолуу райондордо кар жаашы күтүлөт. Чүй, Ысык-Көл облустарынын айрым жерлеринде, Жалал-Абад облусунун тоо этектеринде жана тоолуу райондорунда жаан-чачын катуу жаашы күтүлөт. Батыштан соккон шамалдын ылдамдыгы секундасына 4-9 метрден, кээ бир райондордо 17-22 метрге жетиши күтүлөт.

7-сентябрда жана 8-сентябрда түнкүсүн абанын температурасы кескин төмөндөйт. Чүй өрөөнүндө түнкүсүн 7…12°, күндүз 18…23°, тоо этектеринде түнкүсүн 1…6°, күндүз 13…18°, Талас өрөөнүндө түнкүсүн 4…9°, күндүз 15…20°, Ош, Жалал-Абад, Баткен облустарынын өрөөндөрүндө түнкүсүн 9…14°, күндүз 22…27°, тоо этектеринде түнкүсүн 4…9°, күндүз 16…21°, Ысык-Көл ойдуңунда түнкүсүн 2…7°, күндүз 14…19°, Нарын облусунун дыйканчылык аймактарында түнкүсүн 1…6°, күндүз 15…20°, тоолуу райондордо түнкүсүн 0…5°, күндүз 5…10° жылуу, бийик тоолуу райондордо түнкүсүн -1…-6° суук, күндүз 2…7° жылуу болушу күтүлөт.

8-сентябрда түнкүсүн Нарын облусунун дыйканчылык аймактарында жана Ысык-Көл облусунун чыгышында абанын температурасы 0…-2° болуп, үшүк жүрүшү мүмкүн.

Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.

Автор: Бактыгүл Момбекова