ӨКМнын Ош шаарындагы №109 өрткө каршы куткаруу бөлүмүнүн башчысы дүйнө салды

Ош шаарындагы №109 өрткө каршы куткаруу бөлүмүнүн башчысы Абдимомун Райбердиев дүйнө салды. Бул тууралуу ӨКМнын басма сөз кызматынан билдиришти.

Райбердиев Абдимомун Исрайилович 1961-жылды 20-январында Ош облусунун Кара-Суу районундагы Жаңы-Арык айылында жумушчулардын үй-бүлөсүндө туулган.

1979-жылы Ош облусунун Ноокат районундагы “Россия” атындагы орто мектебин бүтүргөн.

1979-1981-жылдары Советтик Армиянын катарында кызмат өтөгөн.

1981-жылы Армиядан кийин Ош облусполкомунун ИИБнын Ош шаардык №2 Аскерлештирилген өрткө каршы бөлүмүнүн өрт өчүрүүчүсү кызматына кабыл алынган.

1990-жылы Жалал-Абад облусунун Тогуз-Торо районунун РИИБинин мамлекеттик өрт көзөмөл инспекциясынын инспектору кызматына дайындалган.

1993-1994-жылдарына чейин Ош облусунун ИИБинин өрттөн сактоо бөлүмүнүн Жаңы-Арык айылындагы Ош тамеки ферментациялык заводун коргоо боюнча №20 Аскерлештирилген өрткө каршы бөлүмүнүн кароол башчысы кызматында иштеген.

1994-2017-жылдар аралыгында Ош, Баткен, Жалал-Абад облустарындагы Өрткө каршы мамлекеттик кызмат бөлүмдөрүндө жөнөкөй кызматкерден жетекчилик кызматтарда иш алып барып келген.

2017-жылдан 2020-жылдын 26-сентябрына чейин ӨКМнын Ош шаары боюнча башкармалыгынын №109 Өрткө каршы куткаруу-бөлүмүнүн башчысы кызматында эмгектенип келген.

Маркумдун артында үч кыз, бир уулу калды. Өзгөчө кырдаалдар министрлигинин жалпы эмгек жамааты Абдимомун Райбердиевдин жакындарына терең кайгыруу менен көңүл айтып, аза кайгысын тең бөлүшөт.

Автор: Айсалкын Качкынбекова